ఫోర్బ్స్‌ బిలియనీర్ల జాబితా-2025 విడుదలైంది. ఫోర్బ్స్ ప్రపంచ కుబేరుల జాబితా-2025 ప్రకారం ప్రపంచంలో 3000 మందికి పైగా కుబేరులు నమోదవ్వడం(మొత్తం కుబేరుల సంఖ్య 3028) ఇదే తొలిసారి. సంవత్సరకాలంలో వీరి సంపద విలువ 2 లక్షల కోట్ల డాలర్లు (దాదాపు రూ.170 లక్షల కోట్లు) పెరిగి, వీరి మొత్తం సంపద 16.1 లక్షల కోట్ల డాలర్లకు చేరింది. ఫోర్బ్స్ ప్రపంచ బిలియనీర్ల జాబితా - 2025 ప్రకారం అమెరికా 902 మంది కుబేరులతో అగ్రస్థానంలో ఉండగా, చైనా 516 మంది సంపన్నులతో రెండో స్థానంలో, భారతదేశం 205 మంది కుబేరులతో మూడో స్థానంలో ఉంది. అగ్రగామి-10 మంది కుబేరుల్లోనూ 8 మంది కుబేరులు అమెరికా దేశీయులే.

ఆసియాలోనే అత్యంత సంపన్నుడు, ప్రముఖ వ్యాపారవేత్త, రిలయన్స్‌ ఇండస్ట్రీస్‌ అధినేత‌ ముకేశ్‌ అంబానీ 92.5 బిలియన్‌ డాలర్ల సంపదతో ఈ జాబితాలో 18వ స్థానంలో నిలిచారు. మరో భారతీయుడు గౌతమ్‌ అదానీ 56.3 బిలియన్‌ డాలర్ల సంపదతో 28వ స్థానానికి పడిపోయారు.  కాగా, ఈ జాబితాలో టెస్లా, స్పేస్ ఎక్స్ సీఈఓ ఎలాన్‌ మస్క్‌ 342 బిలియన్‌ డాలర్ల నికర విలువతో టాప్‌లో నిలిచారు. మస్క్‌ తర్వాత ఫేస్‌బుక్‌ వ్యవస్థాపకుడు మార్క్‌ బుకర్‌బర్గ్‌ రెండో స్థానంలో నిలిచారు. ఆయన నికర విలువ 216 బిలియన్‌ డాలర్లుగా ఉంది. అమెజాన్‌ వ్యవస్థాపకుడు జెఫ్‌ బెజోస్‌ 215 బిలియన్‌ డాలర్ల నికర విలువతో మూడో స్థానంలో ఉన్నారు.

ఫోర్బ్స్ ప్రకారం మొదటి 10 ప్రపంచ బిలియనీర్ల జాబితా:

1. ఎలాన్ మస్క్ (342 బి.డాలర్లతో),

2. మార్క్ జుకర్ బర్గ్(216 బి.డాలర్లతో)

3. జెఫ్ బెజోస్ (215 బి. డాలర్లతో),

4. లారీ ఎలిసన్(192 బి. డాలర్లతో),

5. బెర్నార్డ్ ఆర్నాల్ట్ (178 బి. డాలర్లతో),

6. వారెన్ బఫెట్(154 బి.డాలర్లతో),

7. లారీ పేజ్ (144 బి.డాలర్లతో),

8. సెర్గీ బ్రిన్ (138 బి.డాలర్లతో),

9. అమాన్షియో ఒర్టెగా (124 బి.డాలర్లతో),

10. స్టీవ్ బామర్(118 బి.డాలర్లతో).